دي حكايه ورده طارق وليد الصفتي الغائبه عن بيت اهلها - كورة لاين - بث مباشر مباريات اليوم يلا شوت koora online

الأربعاء، 23 مارس 2016

دي حكايه ورده طارق وليد الصفتي الغائبه عن بيت اهلها



ورده....اللي بجد اسمها مستحيل يكون حاجه تانيه غير ورده

في البدايه عاوزين نشكر العائله اللي منقدرش نوفيها حقها اللي اعتنت بسحر و اللي بجد حافظت علي الورده دي عشان تسلمها لاهلها ... سحر بجد إنسانه جميله اوي بكل معني الكلمه ... و ده دليل علي حسن التربيه و مدي احترام البيت اللي إتربت فيه سحر.

و بنشكر كمان أسرة دار السيدة نفسيه بحلوان و علي رأسهم بابا (جمال) اللي وفروا كل ما يملكوا من تفاصيل و صور ومعلومات دقيقه وقت إستلامهم لسحر بالدار و حتي تسليمها للاسرة البديله ... مما سهل رحله البحث عن أسرة سحر.

ركزوا بقي عشان الموضوع طويل و تفاصيله كتير ...

الحكايه ابتدت برساله من بنت اسمها مريم بتطلب مننا اننا نبحث معاها عن اَهلها و ننشر حكايتها ... اتصلنا بيها و اتكلمنا معاها ساعات طويله و كانت مترددة مش عارفه اللي هتعمله ده هيكون نتيجته ايه ... انتهت المكالمه الأولي بإننا عرفنا ان اسمها اللي عايشه بيه دلوقت (سحر) و لكنها طلبت مننا اننا نستخدم اسم (مريم) عشان خايفه ان الناس اللي حواليها اللي ميعرفوش قصتها، يشوفوا البوست و يعرفوا الحقيقه و يعرفوا انها هي الطفلة اللي بتبحث عن أهلها ... ثم بدأت من وقتها مراسلتنا من صفحتها الحقيقيه بإسمها الحقيقي (سحر)

نشرنا البوست و بعد ساعات قليله انتشر البوست و شافه اكثر من ٧٠٠ ألف واحد في مصر ... واحده شافت المنشور و تواصلت معانا برساله بتقول انها صديقه لأسره فقدت بنتها من ٢٠ سنه وأنها شبه صوره الطفلة المنشوره ... و أعطتنا رقم بنت خال الطفلة المفقودة من ٢٠ سنه.

تواصلنا مع بنت الخال و عرفنا منها تاريخ تقريبي لإختفاء و ميلاد الطفلة و انها اصلا من المنصوره ... و عرفنا ان الأسره بحثت سنين طويله و تَرَكُوا مصر حزناً علي طفلتهم المفقودة.

بنت خال الطفلة بعتت لنا صوره لأخت الطفلة المفقودة و أخدنا منها رقمها ... و هي اصغر من الطفلة المفقودة بسنتين و هي الان شابه في العشرين من عمرها ... ووجدنا شبه كبير بينها و بين صوره سحر.

اتصلنا بأخت الطفلة المفقودة و كانت مفاجاتنا الاولي اننا حسينا اننا طلبنا سحر بالغلط من كتر ما صوت اخت الطفله المفقوده شبه صوت سحر.

عرفنا من الاخت ان باقي افراد عائلة الطفلة المفقودة يعيشون خارج مصر و عرفنا منها ان اختها المفقوده اكبر منها بسنتين و اسمها (ورده طارق وليد الصفتي) من مواليد يوليو ١٩٩٤ و تاهت و عمرها سنتين و ثلاثه شهور في أكتوبر ١٩٩٦ اثناء زيارتها مع والدها لجدتها التي تعيش في القاهره.

طلبنا من الأخت صوره لورده وهي صغيره و قررت البحث علي صوره ل(ورده) في الصور القديمة ... و بالفعل اثناء بحثها في الصور علي احد اجهزه الكمبيوتر القديمة ... وجدت صوره لورده و قامت بإرسالها لنا.

فور استلامنا لصوره ورده عرفنا انها سحر ولا مجال للشك و فرحتنا وقتها كانت متتوصفش ... و حتي الحلق اللي كانت لابساه سحر وقت العثور عليها و ظاهر في احد صورها ... لبساه ورده في الصوره اللي اختها ارسلتها لنا.

وصلنا الصوره لسحر ... و سحر ورت الصوره لامها البديلة ... و صرخت أمها (ده إنتي) (ده شكلك أول يوم شوفتك في الدار).

اعطينا رقم اخت ورده لسحر و اتكلموا و الاتنين كان تعليقهم لنا بعد المكالمه (انا حاسه اني كنت بكلم اختي)

أرسلت اخت ورده صور سحر المنشوره علي صفحتنا لأخو ورده الكبير م/وليد الصفتي و الذي يعمل بالخارج و أول ما فتح الصوره قال لهم (دي ورده ؟؟ إزاي ؟؟ دي شكلها أكبر من وقت ما تاهت !!! إنتي جبتي الصور دي منين ؟؟)

حكت الأخت لأخوها الحكايه ... و شاف البوست علي صفحتنا، تأكد في الحال ان سحر دي هي أخته (ورده)

انتشرت صور سحر المنشوره عالصفحه في العائله و كان تعليق الجميع الاول (دي ورده!) و من المفاجئات الاخيره ان اهل ورده قالوا علي علامه مميزه جدا عند ورده كانت سحر قايلالنا عليها و مكانتش منشوره في البوست

والآن ورده علي تواصل مع جميع أفراد عائلتها و سيقومون بعمل تحليل DNA لتغيير اوراقها الرسمية لتصبح سحر رسمياً هي (ورده طارق وليد الصفتي).

سحر (ورده) و أفراد عائلتها جميعاً في حالة ذهول بعد ان عثروا علي إبنتهم المفقودة منذ ٢٠ سنه.

سحر لم تتخيل ان تصل الي عائلتها بهذه السرعة و في خلال ساعات من قرارها بالبحث عنهم.

سنكون في الاسكندرية باذن الله مع ورده في مكان سكنها الحالي مع اسرتها البديلة للاحتفال معها و مع أفراد عائلتها الذين سيتوجهوا جميعا للاسكندريه لمقابله وردتهم المفقوده.

مبروك عوده الورده لبستانها ... و مفيش كلام يوصف شعورنا ... ولا عارفين نحكي لكم علي المواقف الصعبه اللي كل يوم كنّا بنتحط فيها ... ضحكنا كتير ، و عيطنا اكثر ... ورده دي بقت أختنا و بنتنا و بنكلمها كل يوم من كتر ما حبناها ... إستغربنا أد ايه التفاصيل مرتبطه ببعض بمنتهي السهولة و ازاي مع كل معلومه كانت بتظهر خلال الايام الماضيه كانت بتقربنا اكتر لليقين ان سحر هي ورده و احساسنا وقت ما تأكدنا مع عائلتها و دموعنا و ضحكنا و فرحتنا معاهم... بجد ربنا كبير.

ملحوظه:

------

- عندنا عرسان لورده كتير اوي ... مصر كلها بتحلم تتجوزها ... كنّا بنفرح اوي بكل عريس ... و هي كانت في عز بكائها و قلقها بتضحك و بتقول مش مصدقه جمال و طيبه أعضاء الصفحه بتاعتكم.

- ورده كانت بتتابع كل كلمه بتكتبوها ... وكانت بتعيط مع كل كلمه حلوه و كل دعوه خارجة من قلبكم.

- ورده و عائلتها هيقرأوا اللي هتكتبوه ... و هيفرحوا بكل دعوه خارجة من القلب.

- الصور دي عبارة عن تلخيص لكل لحظه عشناها مع ورده ... و منسيناش نحط العرسان

------

للأسف يؤسفنا إخباركم ان والده الطفلة ورده بعد ان فقدت طفلتها و لمدة ثلاثه سنوات من البحث في انحاء مصر ... حالتها النفسيه ساءت و خرجت لتوزيع صور ورده في كل مكان..محطات المترو و القطارات و الاقسام ... وللاسف في 1999 تدهورت حالتها النفسيه بشده و خرجت في يوم للبحث عن ابنتها و لم تعد الي منزلها.. ولا تعلم اسرتها مكانها حتي الان ... و هننشر صورة والدة ورده قريباً للبحث عنها و واثقين اننا بإذن الله هنوصل لها عشان تفرح برجوع بنتها.

ليست هناك تعليقات:

إرسال تعليق